...................

मानवी शरीराला वनस्पतीजन्य इस्ट्रोजेनची नितांत आवश्यकता असते. त्यामुळे आहारातील या घटकाचे प्रमाण वाढवले पाहिजे. सोयाबीनमध्ये हे इस्ट्रोजेन भरपूर प्रमाणात असते. शिवाय सोयाबीनमध्ये प्रथिनांचाही मुबलक साठा आहे. रोजच्या जेवणात त्याचा वापर केलाच पाहिजे. खरं तर आपण दररोज खाणाऱ्या गव्हाच्या पिठातही सोयाबीनचं पीठ एकत्र करून त्याचा वापर करू शकतो. पोळी करण्यासाठी गव्हाचं पीठ दळून आणताना काही ठराविक मात्रेत सोयाबीन एकत्र करून ते दळून आणले, तर वेगळे सोयाबीन खाण्याची गरज पडणार नाही. मुलांनाही लहान वयापासून आहारात सोयाबीन दिल्यास त्याचा शारीरिक वाढीसाठी उपयोग होतो. सोयाबीनची भाजी, पराठे असेही अनेक पदार्थ केले जातात, परंतु असे पदार्थ मुलांच्या गळी उतरवणं तसं अवघडच आणि त्यातही ते जर डब्यात दिले तर मग तो डबा तसाच परत आला म्हणून समजावा. म्हणूनच मुलंही आवडीनं खातील अशी या सोयाबीनची एक खास रेसिपी, सोयाबीन कटलेट.. 

सोयाबीनचे चंक, बटाटा, गाजर, कोबी, मटार, कोणत्याही भाज्या, हिरवी मिरची, आले लसूण वाटण, बारीक रवा, तेल.

- सर्वप्रथम सोयाबीनचे चंक पाण्यात भिजत घाला. त्यामुळे ते फुगतील.

- त्यानंतर ते भिजलेले चंक मिक्सरने बारीक करून घ्या.

- घेतलेल्या सर्व भाज्या बारीक किसून घ्या. 

- बारीक केलेले सोयाबीन चंक आणि खिसलेल्या भाज्या एकत्रित करून घ्या. 

- या मिश्रणात बारीक रवा, चवीपुरते मीठ आणि थोडीशी कोथिंबीर घालून हे मिश्रण चांगले एकत्रित मळून घ्या. 

- त्याच्या टिक्क्या तयार करून घ्या. तव्यावर थोडेसे तेल घेऊन या टिक्क्या चांगल्या परतून घ्या. टिक्क्या तयार.

- हाच प्रकार आप्पेपात्रातही करता येईल. बदल म्हणून त्यात तीळ, खोबरं, ओवा, जिरे घालता येईल आणि चवीत बदल करता येईल. 

ई-मेल : kvvrunda@gmail.com